Изјави на мајки | Јога сојуз на Македонија

ИЗЈАВИ НА МАЈКИ

	АЛЕКСАНДРА АЛЕКСОВСКА "Самата помисла дека во себе носам друг живот ме правеше најсреќна на цел свет. Бременоста ја доживеав како досега највозвишен период во мојот живот. Немав никакви проблеми. Се беше во најдобар ред и темпото на живот воопшто не ми се промени. Поради тоа сакав да почнам со јога уште во првите месеци на бременоста. Но бидејќи беше лето и многу беше топло, со јога почнав во седмиот месец на мојата бременост.
На секој час се чувствував опуштено и релаксирано со мисли дека така се чувствува и моето бебе. Поради тоа со нетрпение го чекав секој нареден час. Често практикував да вежбам јога и дома. Поради фактот дека се соочувам со нешто непознато во животот, мислев дека јогата ќе ми помогне при породувањето. Но сепак, морам да кажам дека најмногу ми помогна во моментите пред чинот на породување, кога сé повеќе и повеќе ми се зголемуваа контракциите. Болките ги трпев сосема смирено, практикувајќи го комплетното јога дишење. Никогаш нема да ја заборавам главната сестра Розе која ми велеше дека толку смирена и расположена личност како мене не сретнала, притоа чудејќи се колку добро можам да ги истрпам болките.
Бидејќи предпородилниот период ми траеше од 4:30 наутро до 19:00 вечерта, многу се истоштив и мораше да ми стават епидурална аналгезија, за да можам побрзо да се породам. Самиот чин на породување траеше еден час и на крај родив здраво девојче на кое целиот медицински персонал се чудеше, бидејќи имаше Апгар оценка 10/10. Јога продолжив да вежбам и откако си дојдовме од болница, секогаш водена од помислата дека ако јас сум комплетно смирена и мојата принцеза исто така ќе биде. И навистина беше така. Комплетно фунционираме во една прекрасна хармонија."

KATЕРИНА ЛАЗАРЕВСКА

„Кога лекарот ќе ви ја соопшти прекрасната вест дека ќе станете мајка, веднаш решавате сите лоши навики да ги промените и да “свртите нов лист”. Знаете дека не можете ништо да сторите во врска со гените што ги носите со себе, но не сакате нешто што зависи од вас да го игнорирате. И така внимавате како се храните, не пиете, ако сте пушеле престанувате да пушите и размислувате за часови по јога.

Тоа беше мојот мотив за зачленување на курсот – ова мало чудо што расте во мене и уште сега ми вели: “Јас сум нешто најбитно што се има случено во твојот живот, сакај ме несебично.” И така се најдов во јога центарот.

Првиот час бев толку свесна за секое свое движење што не можев воопшто да се предадам на вежбите и да работам без напор. Дури кога стигнавме до вежбите за дишење успеав да се опуштам. Имајќи во предвид дека никогаш пред тоа не сум имала голем стомак, како што растеше така јас се помалку и помалку го движев и веќе дојдов до ситуација да го држам целосно стегнат не знаејќи како да се справам со него. Со вежбите за дишење успеав да го освестам тој заспиен дел од телото и да ја прифатам неговата промена како сосема нормална.

Втор дел од телото кој бараше внимание беше ‘рбетот. Вежбите за истегнување беа особено полезни за оваа намена. Самиот факт што тие се лесно применливи во секоја ситуација и надвор од часот ми помагаат и покрај секојдневното седење пред компјутер по 10 часа непрекинато на работа и уште барем 2 часа дома да не се будам со болки во грбот.

Не сите вежби се едакво лесни и еднакво прифатливи. На пример вежбите за рамнотежа ми претставуваат особен напор. Според објаснувањето на инструкторката нестабилно тело е одлика на нестабилен ум – не можам да кажам дека не е во право. Меѓутоа, тоа и не е толку важно. Практикуваме јога за бремени не за да покажеме колку асани имаме научено и кој најдобро ќе ги изведе. Практикуваме за да успееме барем за еден час да се изолираме од влијанието на надворешниот свет и да се посветиме само на себе си и на своето бебе. Веројатно затоа во центарот нема огледала – насочени сме кон внатре.

Влегуваме на часот со најразлично расположение – некогаш изморени, некогаш нервозни, некогаш вознемирени, некогаш лути на самите себе или на некој наш близок. Битно е дека сите си заминуваме со исто расположение – релаксирани, смирени и позитивни.“

ЕМИЛИЈА ДУКОВСКА
„Со оглед дека во текот на бременоста сме ограничени да практикуваме одредени спортски активности и многу физички вежби имаат спротивен ефект, се одлучив да го посетам курсот по јога за бремени. Веќе претходно сум слушала позитивни коментари од трудници кои го посетувале и се задоволни како од вежбите така и со самиот чин на породување кои им бил олеснет. Јас неодамна почнав да го посетувам курсот и се чувствувам многу пријатно, бидејќи вежбам од една, а не сум изморена после вежбањето од друга страна. Исто така ми се допаѓа релаксираната атмосфера кога вежбаме како и охрабрувачките и смирувачки зборови на наставниците.“

ЈАСМИНА ПРШЕВСКА
„Да посетувам јога за трудници се одлучив затоа што како трудница се запрашав што е она што можам да го сторам за време на мојата бременост, за да јас и моето бебе се чуствуваме подобро, како и за тоа бременоста да ми биде полесна односно да ги отстранам и оние мали непријатности кои можат да се појават во текот на бременоста како болки во грбот во карлицата и др.

После информирањето за тоа што се можам да практикувам во текот на бременоста односно каков тип на вежби како и од искуство на претходни трудници мои пријателки одлучив дека е најдоброто да започнам со јога вежбите.

Јогата незначи само практикување телесни вежби туку јогата те учи како да се свртиш кон себе си, да го слушнеш своето тело односно да научиш да го слушаш своето тело и со тоа вежбите да ги практикуваш телесно и умствено бидејќи тогаш ефектот од вежбањето е најголем.

Јогата исто така те учи како да се опуштиш и да ја насочиш својата енергија кон себе, те учи и на правилно дишење што е исто така многу важно при породувањето.
Оттука можам да кажам дека за време на часот по јога навистина се чуствувам убаво вежбите се смирени односно без голем напор при што целата своја енергија ја насочувам внатре кон себе си и кон моето бебе, а тоа навистина прави да се чуствувам убаво и опуштено. „